Aankondigings

 

Die Biblioteek- en Inligtingsdiens het, in samewerking met die Sentrum vir Leertegnologieë en ander leer- en onderrigsteunafdelings soos Akademiese IT en die Eenheid vir Gestremdhede, 'n SUNLearn-geïntegreerde leeslysstelsel geïmplementeer. Die stelsel ondersteun die skep en bestuur van leeslyste binne die SUNLearn-omgewing.Ses dosente van die Departemente Opvoedkundige Sielkunde, Musiek, Geografie en Omgewingstudie, die Skool vir Rekeningkunde, die Afdeling Molekulêre Biologie en Mensgenetika en die Fakulteit Teologie het aan die implementeringsfase deelgeneem.

Vir dosente
Course Reading Lists, aangedryf deur Leganto van Ex Libris, stel dosente in staat om die leeslyste vir hul kursusse vanuit SUNLearn te bou en te bestuur. Dosente kan diverse inhoud soos boeke, artikels, oop opvoedkundige hulpbronne, webtuistes, video's, gedigitaliseerde inhoud en kursusnotas van die Biblioteek en elders in 'n enkele leeslys insluit. Die leeslyste is met bestaande biblioteekversamelings gesinkroniseer. Gedrukte en elektroniese materiaal word op een lys byeengebring en intydse beskikbaarheid word vir beide aangedui.

Gebruiksverslae is beskikbaar om dosente te help om die effektiwiteit van hul leeslyste en watter materiaal studente die meeste gebruik deur besigtiging, kommentaar en “likes" te bepaal. Indien verkies, kan 'n opsie aangeskakel word wat  studente toelaat om aan besprekings op die lys deel te neem. Met behulp van Course Reading Lists se oordragfunksie hoef leeslyste nie jaarliks by die Biblioteek heringedien te word nie; die lyste kan eenvoudig opgedateer en hergebruik word.

Vir studente
Course Reading Lists maak hibriede leer moontlik en poog om studente toegang te bied tot die nuutste bronnelysmateriaal wat vir e-leer benodig word. Die lyste het 'n standaardformaat en –struktuur in SUNLearn en is aanlyn toeganklik vanaf enige toestel.

Studente het toegang tot Course Reading Lists vanuit hul kursus in SUNLearn. Hulle kan verwysings as gelees merk en dié verwysings wat hulle geniet “like". Indien deur die dosent geaktiveer, kan studente naderende sperdatums vir die lees van materiaal sien en deelneem aan studentebesprekings op die lys. Hulle kan inhoud vir hul leeslyste aanbeveel, privaat notas en etikette (“tags") by verwysings voeg en gebreekte skakels aan die Biblioteek rapporteer.

Begin jou eie
Hierdie nuwe geïntegreerde kursusleeslysstelsel kom op 'n tydstip waar van studente verwag word om meer met hul dosente via die SUNLearn-stelsel te skakel en word gedeeltelik deur die Universiteit Stellenbosch Strategiese Fonds befonds.

Om meer oor Course Reading Lists te leer en om die stelsel op jou eie te begin implementeer, besoek gerus https://libguides.sun.ac.za/readinglists.

Dosente en fasiliteerders wat van hierdie nuwe funksionaliteit gebruik wil maak om die administrasie van hul kursusleeslyste in 2021 te verbeter, kan Natasja Malherbe (Bestuurder: Digitale Biblioteekstelsels), tel. +27 21 8082845 of hul fakulteitsbibliotekaris kontak.