Mei 2007 [English]

Universiteit Stellenbosch Biblioteek-en Inligtingsdiens  ● Stellenbosch University Library and Information Service

Beste Lesers

Met hierdie uitgawe van Bibnuus deel ons weer eens 'n paar brokkies oor nuwighede en aktiwiteite by die Biblioteek.  Ons nooi ook almal uit om hul menings en voorstelle met betrekking tot die Biblioteek met ons te deel deur middel van die Biblioteek se nuwe blog, BiBlog.

Beste wense met die middeljaar eksamen en die heerlike wintervakansie wat daarna voorlê.

Lucia Schoombee (Redakteur)
 

Nuwe personeel

Verwelkom saam met ons drie nuwe personeellede wat op 1 April by die Bronverskaffingsafdeling aangesluit het.  Hulle is(onder van links): Paulette Taljaard, Laurinda Kleynhans en David Adams.

Alta Stone wen 'n iPod nano in die Biblioteek se kompetisie vir nuwelingstudente

Die Biblioteek bied elke jaar ’n verwelkomingsprogram vir nuwe studente aan.  Die program behels rondleidingstoere deur die Biblioteek, ’n uitstalling van biblioteekdienste, die beskikbaarstelling van inligtingsmateriaal en gratis geskenke soos waterbottels met die slagpspreuk "Info on Tap - drink dit innie Bib". Dié verwelkomingsprogram word gedurende die daaropvolgende week opgevolg met meer in diepte opleiding oor hoe om die katalogus en ander inligtingsbronne te gebruik.

Omdat dit vir ons so belangrik is dat studente die verwelkomingsprogram bywoon, het ons besluit om vanjaar ’n prys aan te bied om studente aan te spoor om aan die program deel te neem. Die Biblioteek bied ’n magdom inligtingsbronne; inligtingsgeletterdsheidsopleiding en 'n groot verskeidenheid dienste aan en as studente nie daarvan bewus is nie kan hul akademiese prestasie daaronder ly.

Die prys het inderdaad as aansporing gedien met 964 studente wat vanjaar die program meegemaak het, teenoor 838 studente in 2006. Dit dui op ’n beraamde 47% bywoningsyfer deur nuwelingstudente met die hoogste bywoningsyfer deur die Fakulteit Natuurwetenskappe, naamlik 68%.  Altesaam 705 studente het vir die kompetisie ingeskryf.
 

Ellen Tise (Senior Direkteur) en Elda Nolte (Assistentdirekteur: Kliëntedienste) van die Biblioteek by Alta Stone, wenner van die iPod nano in die kompetisie vir nuwelingstudente

Nuwe inisiatiewe

Metalib

Die nuwe Metalib soekstelsel maak dit vir biblioteekkliënte moontlik om gelyktydig in meer as een databasis na inligting te soek. Die veelvoudige soekfasiliteit sluit meer as 60% van die databasisse in waarvoor die Biblioteek ‘n aktiewe subskripsie het.  Kliek hier om 'n soektog in veelvoudige databasisse uit te voer.

SFX
SFX is nog ‘n diens wat vanjaar geïmplementeer is. Hierdie diens laat biblioteekkliënte toe om toegang te verkry tot die volteks weergawe van artikels in databasisse indien dit beskikbaar is.  Met SFX is dit ook moontlik om 'n groot persentasie bronne waaroor die Biblioteek beskik deur middel van Google Scholar op te spoor.  'n "Full Text @ Stellenbosch" skakel verskyn in die Google Scholar soekresultate van kliënte wat kampusrekenaars gebruik. Deur op dié skakel te kliek, verkry die biblioteekkliënt toegang tot die volteks weergawe van die artikel.
 

Elektroniese tesisdatabasis
‘n Elektroniese tesisdatabasis wat gebou is op die DSpace-programmatuur, is opgestel en vir ‘n proefperiode in gebruik geneem om die laai van oop toegang (“open access”) tesisse en proefskrifte te toets. Verskeie tesisse is gelaai en deur soekenjins soos Google en Yahoo geïndekseer en vindbaar gemaak. Die prosedures vir die korrekte inhandiging van tesisse en proefskrifte (met inagneming van embargo’s en uitgewerooreenkomste) geniet nou aandag alvorens die databasis finaal in gebruik geneem sal word.
 

Navorsingsuitsette
‘n Databasis vir die stoor en herwinning van die navorsinguitsette van die Voortreflikheidsentrum vir Indringerbiologie is suksesvol ontwikkel en in gebruik geneem. Hierdie databasis, wat ook op DSpace programmatuur gebou is, dien as ‘n goeie riglyn om in die toekoms ander institusionele navorsingsuitsette beter te kan bestuur.
 

Biblioteektuisblad
Die biblioteektuisblad het ‘n nuwe gesig gekry wat daarop gemik is om toegang tot inligtingsbronne te verbeter en om 'n gebruikersvriendelike beeld te skep.  Daarmee saam is ‘n blog geskep om vir kliënte die geleentheid te gee om voorstelle te maak wat dienslewering kan verbeter. ‘n “RSS feed” is ook daargestel waarmee kliënte deurlopend op hoogte kan bly van nuwe ontwikkelings by die Biblioteek.

Ellen Tise genomineer vir IFLA president

Me Ellen Tise wat in 2006 die leisels van die Biblioteek- en Inligtingsdiens oorgeneem het, is deur die International Federation of Library Associations and Institutions (IFLA) as 'n kandidaat genomineer vir dié organisasie se presidentskap (2009-2011).

Lees gerus hier meer oor die nominasie en me Tise se verkiesingsmanifes.

Biblioteekpersoneellede sal gedurende die eerste semester by die volgende konferensies bydraes lewer:

"International Conference on Postgraduate Supervison: The State of the Art and the Artists" (23 – 26 April 2007) by die Universiteit Stellenbosch.  Joanne Arendse, Melinda Heese and Henriëtte Swart neem by hierdie geleentheid deel aan 'n paneelbespeking: "Adding value: a discussion on the academic librarian’s role in supporting postgraduates and researchers at Stellenbosch University".

"2nd International Conference on ICT for Development, Education and Training" (28 - 30 Mei 2007), Nairobi, Kenia.  Joanne Arendse  en Pieter du Plessis lewer by hierdie geleentheid 'n referaat: "Challenging times: information literacy, librarian/lecturer partnerships and e-Learning".

"Konferensie oor die Akademieskap van Onderrig en Leer" (22-23 Mei 2007), Technopark, Stellenbosch. Elbie van Wyk lewer by hierdie geleentheid 'n referaat: "Librarian/Lecturer partnerships and e-learning: 'taking' the library resources to the students".

Van links is:  Johan Engelbrecht (Adjunkdirekteur), Marié Roux (Organiseerder van die fondsinsameling) en Ellen Tise (Senior Direkteur), almal van die Biblioteek, Lorenza Williams (Watergarden), Jerome Slamat (Direkteur: Gemeenskapsinteraksie) en Jan Bodenstein (Watergarden)

Gemeenskapsamewerking

Die Biblioteek se tradisionele Kersfondsinsameling wat aan die einde van 2006 ten bate van die Watergardenprojek geloods is, het R2000-00 opgelewer waarmee tien gazebo's aangekoop kon word.  Gazebo's was 'n spesiale behoefte wat deur die projekleiers geïdentifiseer is om buitelugaktiwiteite met die kinders in die projek te vergemaklik. Ander items wat ook vir die projek geskenk is, sluit rakke, woordeboeke, kompakte skywe en ‘n digitale kamera in.

Die Biblioteek is baie trots op en dankbaar teenoor  personeel wat met soveel entoesiasme die projek ondersteun het en dit steeds doen deur middel van voortdurende skenkings wat vir die projek gemaak word.

Lees hier oor die Watergardenprojek of kontak Marié Roux vir meer inligting.

Naamsveranderinge

Die US Biblioteekdiens is herdoop na die US Biblioteek- en Inligtingsdiens om die diversiteit en omvangrykheid van dienste te weerspieël wat aangebied word.

Bibliotekarisse by die JS Gericke Biblioteek wat vakspesifieke inligtingsdienste aanbied, voorheen bekend as vakbibliotekarisse, heet nou fakulteitsbibliotekarisse. Die betrokke personeellede is:
Melinda Heese – Fakulteit Regsgeleerdheid
Elbie van Wyk – Fakulteit Natuurwetenskappe
Carine Tymbios / Hanlie Strydom – Fakulteit AgriWetenskappe
Niel Hendriksz – Fakulteit Lettere en Sosiale Wetenskappe
Naomi Visser / Marié Roux – Fakulteit Lettere en Sosiale Wetenskappe
Marleen van Wyk – Fakulteit Lettere en Sosiale Wetenskappe
Sarie Wilbers – Fakulteit Opvoedkunde
Pieter du Plessis – Fakulteit Ekonomiese en  Bestuurswetenskappe
Joanne Arendse – Inligtingsgeletterdheidsbibliotekaris
Tracy Britz – Afstandstudentebibliotekaris
Thea Basson – Staatspublikasiebibliotekaris
 

Die naam van die afdeling verander ook na die Afdeling Inligtingsdienste, waarvan die hoof Delene Pretorius is.

Prof Jannie Hofmeyr ontvang 'n geskenk vir sy deelname aan die "Biblioteeksterre" inisiatief.  Saam met hom is Lucia Schoombee (Webdienste en Kommunikasie) en Ellen Tise (Senior Direkteur) van die Biblioteek- en Inligtingsdiens

Biblioteekweekvieringe

'n Feestelike stemming het vanjaar met  Biblioteekweek-vieringe by die Biblioteek- en Inligtingsdiens geheers.  Aangesien die tema van Biblioteekweek "Biblioteke: jou sleutel tot die toekoms" so goed ingeskakel het met die Biblioteek se missie, is dit as 'n carte blanche beskou om die Biblioteek se teenwoordigheid en rol op kampus op 'n vermaaklike wyse te herbevestig.

In die aanloop tot Biblioteekweek is sewe bekende Stellenbosch-kampus figure genader om hul ondersteuning vir die Biblioteek in die openbaar te verklaar, elk ter ondersteuning van 'n spesifieke diens wat hul van besondere waarde ag, waarna plakkate van die "sterre" en hul aanhalings laat maak is.

Die "Biblioteeksterre" is: (kliek op 'n foto om die naam en aanhaling te sien)

In 'n verdere poging om soveel studente as moontlik se aandag op die Biblioteek te vestig, is 'n bekende Stellenbosse groep genooi om 'n konsert in die opelug amfiteater by die ingang van die Biblioteek aan te bied.  In gloeiende hitte het die groep, Clark & Van der Hoven "folk-rock" musiek uitgebasuin en tussenposes  deurspek met slagspreuke oor die waardes van die Biblioteek.

In meer tradisionele trant is André P Brink, bekende Suid-Afrikaanse skrywer, na die Biblioteek genooi om sy boek, Die Ambassadeur, wat al vir baie jare vir Afrikaans en Nederlandse studente voorgeskryf word, te bespreek.

Ander aktiwiteite het 'n boetekwytskelding en uitstallings oor André P Brink, oor die fyn lyn tussen die boek en kuns en oor Stellenbosse skrywers ingesluit.  Dié uitstallings het die interieur van die JS Gericke Biblioteek opgevrolik en sommige van die Biblioteek se verborge skatte uitgelig.

Clark & Van der Hoven tree op voor die Biblioteek

Bibnuus word kwartaalliks uitgegee deur die Biblioteek- en Inligtingsdiens.
Kommentaar word verwelkom.  Stuur asseblief 'n e-pos aan Lucia Schoombee.
Erkenning: Sonja Badenhorst vir die titelbanier.