|
Beste Lesers
Met hierdie uitgawe van Bibnuus
deel ons weer eens 'n paar brokkies oor nuwighede en aktiwiteite by die Biblioteek
met julle.
Ons nooi ook almal uit om jul menings en voorstelle met betrekking tot die
Biblioteek met ons te deel deur middel van die Biblioteek se nuwe blog,
BiBlog.
Lucia Schoombee (Redakteur)
Pret op Loslitdag
Bibliotekarisse by die JS Gericke Biblioteek het vanjaar met loslitdag
behoorlik gees en vrygewigheid openbaar met hele afdelings wat
volgens temas aangetrek en bygedra het tot die fondsinsamelingsaak.
In die foto (bo) vanaf links: Marie de Goede, Anna Kennedy, Elise
Coetzee, Sheila Keet, Ivan Jacobs, Selma Kloppers en Paulette Talliard
Kliek op die foto's hieronder om nog Biblioteekpersoneel in kostuums
op Loslitdag te sien.
Terugvoer oor fokusgroepgesprekke
Die kwantitatiewe LibQual biblioteekmeningsopname wat in
2005 uitgevoer is, het tot gevolg gehad dat verdere navorsingsareas geïdentifiseer
is vir
kwantitatiewe navorsing deur middel van fokusgroepgesprekke.
Hierdie kwessies was (1) redes vir kliënte se negatiewe persepsie oor die
gehalte van die biblioteekversameling (inligtingsbronne) (2) redes vir
kliënte se negatiewe persepsie oor toegang tot inligtingsbronne.
Die fokusgroepgesprekke is in Maart vanjaar gevoer en is deur Marlize Smit
en Debbie Human van die Departement Ondernemingsbestuur gefasiliteer.
Ongeveer 20 akademiese personeellede en nagraadse studente onderskeidelik
het deelgeneem aan die gesprekke. Terugvoer uit die
fokusgroepgesprekke was oorwegend positief en geen groot probleemareas is
met betrekking tot inligtingsbronne geïdentifiseer nie. Respondente
het egter areas aangedui wat frustrerend is en wat verbeter kan word.
Dit blyk dat die kommer oor die gehalte van, en die toegang tot, die
biblioteekversameling (elektronies en fisies) wat tydens die LibQual
opname uitgewys is, te wyte is aan 'n aantal kleiner kwessies en nie die
gevolg is van ernstige probleme nie.
Die gevolg van die fokusgroepgesprekke is dat die Biblioteek spesifieke
aksies beplan om die kommer wat deur deelnemers uitgespreek is,
aan te spreek.
'n Paar voorbeelde van beplande aksies is:
-
'n Opname om die moontlike tekortkominge in die
Biblioteekversameling rakende plaaslike (Suid-Afrikaanse) publikasies
wat verband hou met kwessies wat binne Suid-Afrikaanse konteks van
belang is, te bepaal.
-
'n Ondersoek
om die moontlikheid van elektroniese aflewering van artikels wat deur die
interleningstelsel aangevra is, te bepaal.
-
Verbeterde
buite-kampus toegang tot elektroniese bronne(afgehandel).
-
Die
ontwikkeling van 'n "how to" -webblad om kliëntselfversorgendheid te
ondersteun met betrekking tot die opspoor van bronne, inligting en
elektroniese dienste op die Biblioteekwebwerf.
-
Fokus op die
aanbied van vakspesifieke kurrikulumverwante
inligtingsvaardigheidsprogramme in fakulteite ten einde
biblioteekopleiding in spesifieke modules te integreer.
Die volledige
uiteensetting van die geïdentifiseerde tekortkominge en die Biblioteek se
voorgesteld oplossings is beskikbaar op die Biblioteek se webwerf by:
http://www.lib.sun.ac.za/Fokusgroepe/feedback.htm
Internasional besoekers
Daar was die
afgelope twee maande, wat gevolg het na die
IFLA konferensie, 'n bestendige vloei besoekers
aan die JS Gericke
Biblioteek.
Een van die
besoeke wat uitgelig kan word, is die van Biddy Fisher, Hoof van
Inligtingsdienste, Sheffield Hallam Universiteit en lid van die
Uitvoerende Raad van SCONUL, die VK Vereniging van Kollege, Universiteits-
en Nasionale Biblioteke wat saam met haar eggenoot (Die
Sekretaris-generaal van die Vereniging van Statebond Universiteite) die
Universiteit op 5 September 2007 besoek het.
In die foto (bo) vanaf links: Lucia Schoombee (US), K Kekana
(UWK), Sarah Kibirige (US), Wynand van der Walt (UWK), Elda Nolte (US),
Pateka Ntshuntshe-Matshaya (UWK), Biddy Fisher (Sheffield), Ellen Tise
(US)
Ander onlangse besoekers aan die JS Gericke Biblioteek sluit in:
Van Noorweë:
Frode Bakken, Direkteur van die biblioteek by Telemark Universiteitskollege in Noorweë en voormalige president van die Noorweegse
Biblioteekvereniging.
Helge Salvesen, Professor in geskiedenis en Direkteur van die
Universiteitsbiblioteek van die Universiteit van Tromsø in Noorweë en lid
van die raad van die Noorweegse Biblioteekvereniging.
Van China:
'n Afvaardiging van die Nasionale Biblioteek in China. Die besoek
het voortgespruit uit 'n wederkerige ooreenkoms tussen die Departemente
van Kuns en Kultuur van die onderskeie lande. Die Nasionale
Biblioteek van Suid-Afrika het gevolglik 'n wederkerige ooreenkoms met die
Nasionale Biblioteek van China gesluit.
Van Finland:
Päivi Pekkarinen, Nasionale Gesondheidswetenskappe Biblioteek van
Finland.
Eeva Murtomaa, Nasionale Biblioteek van Finland.
Eila Ramo, Universiteit van Kuns en Ontwerp Biblioteek van Finland.
Van Angola:
Twee besoekers van Angola wat die taak opgelê is om biblioteke dwarsoor
Angola ('n akademiese inligtingsnetwerk) tot stand te bring en om in
Suid-Afrika vir die doel advies in te win en beste praktyke te
identifiseer:
Samuel Carlos Victorino (konsultant vir dr Adao do Nascimento, die
Minister van Onderwys in Angola) en Joaquim José Migueis.
Van Kansas (VSA):
Lorraine J Haricombe, Dekaan van Biblioteke, Universiteit van Kansas.
Van Kentucky (VSA):
Kathleen RT Imhoff, Uitvoerende direkteur, Lexington Opebare Biblioteek.
|
Die Biblioteek brei sy e-boekversameling uit 
Die Biblioteek- en Inligtingsdiens bied nou toegang tot 'n groot aantal
elektroniese boeke in baie vakdissiplines. Die meeste daarvan vorm deel
van groot e-boekversamelings wat deur middel van die uitgewer se
koppelvlak soekbaar is. Die meerderheid e-boeke is ook
individueel in die Biblioteekkatalogus gekatalogiseer.
Bykomend tot die versamelings waarop die Biblioteek ingeteken
is, word 'n aantal vryelik beskikbare (gratis) e-boekversamelings ook deur
middel van die Biblioteek se e-boeke webblad beskikbaar gestel by
http://library.sun.ac.za/eng/finding/ez_books.html.
E-boeke is elektroniese weergawes van gedrukte boeke wat deur
die Internet toeganklik is. Sommige e-boeke word uitsluitlik in
elektroniese formaat beskikbaar gestel.
Prosedures om toegang te kry, wissel: sommige moet "uitgeneem" word,
soortgelyk aan die uitneem van 'n tradisionele gedrukte boek. Ander
kan gelees word deur bloot die hipertekskakel te volg.
Beide binne- en buitekampus kliënte kan toegang kry tot e-boeke.
Buite-kampus kliënte sal versoek word om aan te teken met hul US
kampusnetwerk of -portaal aantekenkode om toegang te bewerkstellig.
Die groot e-boekversamelings wat die Biblioteek toeganklik maak, sluit
in:
African Digital Library
Ongeveer 4000 elektroniese boeke, gratis beskikbaar. Oorwegend oor
die onderwerp van bestuurswetenskappe.
Credo Reference
'n Versameling van meer as 250 naslaanwerke.
Ebrary
'n Groot versameling akademiese e-boeke oor 'n wye verskeidenheid
onderwerpe, insluitende naslaanwerke.
Gale Virtual Reference Library
'n Versameling ensiklopedieë, kalenders en gespesialiseerde naslaanwerke.
'n Aantal individuele titels wat beskikbaar is, sluit in:
Oxford Dictionary of National Biography
Oxford English Dictionary Online
Pharos Woordeboeke / Dictionaries
The Stanford Encyclopedia
of Philosophy (SEP)
Ullmann's Encyclopedia of Industrial Chemistry
Woordeboek van die Afrikaanse Taal (WAT)
World of Microbiology and Immunology, 1st Ed, 2V
Who's Who of Southern Africa
Vir meer inligting of vir navrae, kontak gerus jou
fakulteits- of takbibliotekaris.
Encyclopædia Britannica Online
Encyclopædia
Britannica Online is een van die elektroniese naslaanwerke wat deur die
Biblioteek beskikbaar gestel word.
Dié bron bevat
73 000, sowel kort as boeklengte, artikels oor 'n groot aantal
onderwerpe.
Buiten
artikels, het Encyclopædia Britannica Online ook onderafdelings en
multimedia-formate soos:
Video
Collection (Videogrepe)
World Atlas
(Verken die wêreld)
Compare
Countries (Vergelyk inligting tussen twee lande)
Timelines
(Verken die verlede)
Year in
Review Browse (Lees oor vername persone en gebeure)
World Data
(Inligting en statistiek oor lande)
Notable
Quotations (Snuffel deur aanhalings van skrywers of onderwerpe)
Encyclopædia
Britannica Online is beskikbaar deur die Biblioteek se webwerf by:
http://library.sun.ac.za/eng/finding/ez_books.html.
Sekuriteit
opgeskerp by die JS Gericke Biblioteek
Na 'n onlangse vlaag diefstalle in die Biblioteek was
Biblioteektoegangsbeheerpersoneel noodgedwonge genoop om helderkleurige
sekuriteitsonderbaadjies aan te skaf .
Daar word gehoop dat
die nuwe uniforms die sigbaarheid van sekuriteitsrondtes in die
Biblioteek sal verhoog en daardeur as 'n afskrikmiddel sal dien teen
boosdoeners.
Besoekers word
nogtans versoek om te alle tye waardevolle items by hulle te hou terwyl
hulle in die Biblioteek is.
In die foto (bo) vanaf links: Qobolakhe Botha en William Endley
Nuwe boeke Nuwe boeke word elke week, vir een week lank,
in die JS Gericke Biblioteek uitgestal (regs van die ingang, naby die
koeranttafels). Die boeke kan daar besigtig word en by die
Uitleenafdeling bespreek word, waarna dit die daaropvolgende week beskikbaar
is vir uitreiking.
Elsevier se Scopus beskikbaar vir 'n toetsperiode
Die Biblioteek het vir 'n proeftydperk van een maand toegang tot Scopus
bewerkstellig.
Scopus, 'n produk van Elsevier Publishing Co., word algemeen beskou as
die wêreld se grootste ekserp- en indekseringsdatabasis wat die volle
spektrum van wetenskaplike, tegnologiese en mediese literatuur dek,
asook 'n beperkte dekking bied van die sosiale wetenskappe.
Die databasis word deur Web of Science, waarop die Biblioteek reeds
inteken, geëwenaar.
Personeellede en studente van die Universiteit word aangemoedig om
Scopus te toets terwyl dit vir 'n proefperiode beskikbaar is en om
kommentaar te stuur aan Marita Landsberg.
Kliek
hier vir die vorige uitgawes van Bibnuus.
|
Oct
2007
[
